15 Dec

A wohre Weihnochtsgschicht ....

Veröffentlicht von E.lisa - Kategorien: #Alltag

Mei Tant , de Anitant, de wohnt net weit weg va mein Ötarnhaus und drum ham mas eftas bsucht, wia ma nu Kinda worn, mit da Mama auf an Kuchen und an Kaffee. Gern hob´is meng , de kloane runde Anitant, wauns dagesessn is und dazöhlt hot, va friaha , wia si nu gaunz a kloans Mensch wor.

Net leicht haums es ghobt, hotz imma gesogt, flüchten haums miassn, domois aus da Tschechei, va gaunz obm aun da tschechischn Grenz is ihr Mama gwesn, und da Voda gor a Tschech, und daun wias Grenz zu mocht haum , und olle Österreicher vatriem worn san aus da Tschechei, daun haums hoit weg miassn und da Voda hotz net hucka lossn, wia ba sovui aundre, na ihr Voda is mit eana flücht ind Scheibbsa Gegnd und durt haums ba an Baun a Obdoch gfunden. An Schupfa , owa an gmaut´n , Fensta worn koa drin, oba da Voda hod mit Hoiz und ana Plauna de Fensta odicht, dass koa wind aukinna hod .

Durt haums bleim dirfa, wäu da Voda wor a gschikta Mau, der hod in Baun dafir ghoifa fia des dass in dem Schupfa haum wohna dirfa. D´Anitant wor jo domois nu gaunz kloa, ocht Jahr sowas, host gsogt. Oba sie hot recht schnö dakennt, dass ihr Famülie za de gaunz Orma kert, Flüchtling aus da Tschechei hoit...
Und daun wor´s hoit amoi soweit, dass wida weihnochten worn is und d´Anitant und ihr Muata und ihr Voda san in da Schupfn gesessn und es wor nur mehr a hoibats Loa Brot do, fiad Feita ...sunst nix D´ani hot Zänt zaumbissn, damits net rehrt, wei´s genau dakennt hod, wie trauri de gaunze Famülie wor.

Draust is scho finsta worn, d´Petroliumlaupn hot a weng a Licht gem und d´Muata hod gsogt, dass heit boid schlofa gengan, wei da Ofa a scho boid ausgeht .. und wias se sie scho gricht haum, zan nidaleng, do hot´s af amoi aun da Stodltiar pumpat und eina kema is da Bau, und der hod an gaunzn Loa Brod und a Bratlfettn brocht, er hod a schens Weihnochtsfest gwinscht und is wieda gaunga...
und fünf Minuten späta, do hot´s wieda an der Tiar pumpat und a Nobar is drausst gstaund´n mit an Glasl Honig und a por Öpfi und wia in an Märchen is gwen, hot d´Anitant imma vazöht...
wei noch und noch san olle Nobarn daherkemma und jeda hod wos mitbrocht und zan Schluß sans dogsessn de Anitant und ihre Ötarn und da gaunze Tisch wor voi und sofüü haums ghobt, dass gaunz laung glengt hod und D´Anitant hod gsogt,
dass sie se niemois mehr im Lebn so reich gfüht hod...